N’ inviernu
a vista d’occhiu
s’accuzzunu li jurnati
annannu avanti
no tardu pomiriggiu
scinna cchiù prestu
la sirata
unni dagghè
s’annumunu i lampiuni
pi lustru fari.
Co bavuru azzatu
po friddu
che penetra nill’ossa
comu tanti furmiculi
si va jennu
pa strada di casa.
Finu a quannu
lu vientu nu smetti
di fischiari
tranquilli si po’ stari
cà l’acqua do cielu
nun po’ arrivari.
N’autra cosa
se qualchi lampu
s’avvicinassi dalli muntagni
saribbi
purtaturi di svinturi
segnu che si po’
tribbulari.
A secunnu dill’altizza
putissi macari
nivicari
un Natali jancu
‘nzemula di passari
pi ranni e nichi
na festa ranni.
Senza tilivisioni
annumata
jucannu e carti
mangiannu
castagni caliati
cu nu biccheri
di vinu
accumpagnati.
S. Dugo